41歲藝人鄧健泓(Patrick)成功向29歲歌手女友石詠莉(Sukie)求婚!Sukie前晚在頒獎禮勇奪唱片銷量獎,Patrick炮製驚喜派對並跪地送花送戒指求婚,令Sukie感動得哭成淚人。

同甘共苦的Patrick與Sukie有情人終成眷屬。

Patrick跪地求婚,Sukie哭成淚人。

Patrick咀Sukie,並戴上求婚戒指。

Sukie在頒獎禮奪得兩個獎項。

鄧健泓2012年與石詠莉拍拖,並共同製作Hi-Fi碟,前晚Sukie在《IFPI香港唱片銷量大獎2015頒獎典禮》憑首張Hi-Fi碟《聽聽Sukie's》連奪十大銷量廣東唱片及躋身十大銷量本地歌手,Patrick為女友舉行驚喜派對,並趁機求婚。

前晚約有50名親友出席,包括雙方家人及Sukie老闆蕭定一,Sukie踏入宴會廳見到一眾親友拍掌歡迎已狂喊,台上的Patrick說:「呢兩個獎對我哋好大意義,我哋目標係IFPI,結果我哋做到,我哋做每一樣嘢都有目標,人生係、愛情都係,所以今日我想做一樣嘢,佢成日話我未求婚,我想喺正確時間求婚!我想講,多謝你,我唔富有,我會將最好嘅同你分享,以後都係,永遠都係。」其後他拿出99朵粉紅玫瑰及鑽戒跪地求婚,更緊張得不停傻笑,並發表愛的宣言:「呢三年我哋經歷好多,經歷佢最唔開心時間,亦試過一齊做啲嘢有成績,希望將來我哋一路喺呢條船度繼續向前行,你願意嫁畀我嗎?」全程爆喊的Sukie首肯,Patrick為她戴上鑽戒,兩人在親友見證下親吻。

緊張亂晒龍

昨日Sukie接受電話訪問,聲沙沙地笑言派對上哭得太多,並坦言之前毫不知情,只覺得身邊朋友「有啲唔尋常」,Patrick又蠱蠱惑惑傾電話:「原來係搞緊呢樣嘢,佢願意為我付出,係冧爆嘅!尋晚拎咗兩個對我人生好有意義嘅獎,之後發生嘅事仲咁驚喜,突然間好多回憶出咗嚟!」Sukie笑指Patrick求婚時亂晒籠,雞手鴨腳不知應先送花還是送戒指:「不過對我嚟講佢都做足晒所有嘢,好滿意,同埋要讚佢演技好!佢好細心,現場Backdrop都用我最鍾意嘅紫色!(求婚戒指幾多卡?)唔識分,對我嚟講係個心意,我唔需要大粒,依家幾時擺酒都未定。」Patrick表示花近一個月時間籌備派對,但求婚時腦海空白,問到何時註冊結婚同擺酒?他表示今年是盲年,想等女友今年完成第二隻Hi-Fi碟後才計劃婚事,他又讚Sukie不在乎鑽戒多少卡:「價錢唔緊要,最重要誠意,我就算畀隻草戒指或者汽水樽蓋畀佢,我諗佢都會應承,因為佢已經知道個情意。」

舊愛送祝福

另外,鄧健泓的恩師陳志雲昨日出席馬浚偉的製作公司成立典禮時表示,早已猜到鄧健泓打算求婚,笑指石詠莉應戲劇化點不要答應,問到會否出席他們婚禮?他說:「睇吓佢請唔請啦,做司儀我都會,收平啲,表演埋都得(送咩禮?)我到已經係禮物啦!」鄧健泓的兩位舊愛龔嘉欣及李施嬅大方送上祝福,龔嘉欣說:「結婚是一件開心的事,真的替他們高興,也祝福他們幸福快樂!」與鄧健泓曾拍拖四年的李施嬅則以短訊表示:「Very happy for them both!等收請帖。」

文:影視組

thedailycanvas.com thedailycanvas.com thedailycanvas.com thedailycanvas.com thedailycanvas.com dtownpost.com dtownpost.com dtownpost.com dtownpost.com dtownpost.com